Iruñea: "Karrikiri", otsaileko "karrika"

"Labetik atera berri den Karrika aldizkarian Ainhoa Aranburu
bertsolari eta bertsolaritza irakasleari egindako elkarrizketa interesgarria aurkituko duzue,
euskaldun berriek bertsolaritzarekiko duten atxikimenduaren inguruan.
Horretaz landa, gure zenbaki berrian inauteri giroa,
otsailean izanen dugun Karrisolasa, Nafarroako Bertsolari Txapelketa,
Topaguneko presidentearen esanak eta beste hainbat kontu ditugu hizpide.

Azaleko artikuluan, esan bezala, Karrikiri dendan aurkituko dituzuen inauteri osagaiak
eta hilaren 20ean eginen dugun Karrisolasaren hurrengo saioaren inguruko informazioa
aurkituko duzue eta agendaren baitan, hilero legez, ekitaldi aunitz:
Nafarroako Bertsolari Txapelketaren saioak, Iruñean kantuz, Kaldereroak,
Santa Ageda, haurrentzako zinea, Iruñeko inauteriak, mendi ibilialdiak,
erakusketak, sormen tailerrak, lehiaketa, e.a.
Elkarrizketaren tartean, Iruñeko Hizkuntz Eskolan
euskaldun berriekin bertsolaritza lantzen duen Ainhoa Aranburu
irakasle eta bertsolariarekin aritu gara solasean bideratzen ari diren
egitasmo interesgarriaren berri izateko.
Ekarpenen atalean, Mikel Irizar Topaguneko presidentearen artikulu interesgarria
azaroan egindako kongresuaren inguruan eta Nafarroan horrek izan dezakeen isladaz
eta euskalgintzak izaten ahal duen protagonismoaz.
Azkenik, gure gomendioei erreparatuz gero, Mikel Antzaren "Atzerri" lana
eta Emilo López de Adánen "ETAren estrategia armatuaren historiaz"
lanak aurkituko dituzue eta Sei urte taldearen "Atlantida"
eta Joserra Senperenaren "10 trio piano, biolin eta akordeoirako" diskak.
Eta ez ahaztu otsaila osoan sekulako merkealdia
eginen dugula Karrikiri dendan: % 50eko beherapenak.
Izan ere, dendako gure afixak dion moduan,
BEHERA PENAK ETA GORA POZAK!!".

"www.karrikiri.org"