Baigorri: diaspora

Arbasoen Ildotik proiektuko ikasleak. (Argazkia : Xantxo Lekumberry)

"2013an, Xantxo Lekunberry, Donostei kolegioko euskara irakaslea, Kalifornia eta Nevadan egon zen han duen familia bisitatzeko. “Bidaiarekin lotua, pentsatu nuen ideia ona zela proiektu pedagogiko haundi bat eramaitea ikasleekin”, zehaztu du irakasleak. Ikastetxeak bazekien 2013. urteko seigarren mailako klasea txikia izanen zela, beraz egokia iruditu zitzaion proiektua aitzina eramaiteko.

Ikasleen burasoekin bilkura bat egin ondoren, Donostei kolegioak Arbasoen Ildotik proiektua martxan jarri zuen. Hunen helburua da Estatu Batuetara bidaiatu zuten euskaldunen arrastoak bilatzea, baina batez ere hurbilagotik ezagutzeko, 2016ko urrian harat joaiteko bidai bat antolatzea.
"Nahi duguna ikasleek gure arbasoak zergatik joan ziren deskubritzea da. Ez bakarrik euskaldun dirudunen ideia ukaitea, baizik eta konturatzea batzuek ez dutela kausitu, beste batzuek lortu dutela eta beste anitz itzuli direla", argitu du Xantxo Lekumberryk. Horretarako, Donostei kolegioko ikasle hauek astero ordu batez proeiktua prestatzeaz gain, euskal diaspora aztertzen dute. Gainera, "gai guzietan erakasleak Estatu Batuetako gauzak lantzen dituzte".

Proiektua hasi denetik, ikasleak hango herritarrekin harremanetan jarri dira eta lekukotasunak bildu dituzte. "Han diren euskaldunekin mintzatu dira jakiteko, adibidez, nun biltzen diren eta zer egiten duten euskaldun nortasuna atxikitzeko", gehitu du irakasleak.

2013tik burasoek ekitaldi andana bat antolatu dituzte: talo salmenta Nafarroaren egunean edo iragan den urtean Erramun Martikorena eta Iruñeko Orfeoiak eskeinitako kontzertua. Horretaz gain, urtarrilaren 29tik aitzina, euskal diasporarekiko interesa duten ikasle hauek “crowfunding” kanpaina bat abiatu dute.

Diru bilketaren lehen helburua 1.100 euro lortzea zen, ikasle batentzat hegazkin billete bat ordaindu ahal izateko. Aste bat beranduago, ikasleek ikusi zuten beren helburua lortu zutela. Gaur egun, Arbasoen Ildotik crowfundig kanpainak 1.700 euro baino gehiago lortu ditu.

Etorkizunerako, Xantxo Lekunberryk esplikatu duen bezala, Pantxo Irigaraik idatzitako antzerki bat prestatuko dute. “Ikusgarria landuko dugu aurten eta ikasleek antzerki hori San Franciscoko Euskal Etxean eskeintzea nahi dugu”, adierazi du irakasleak".

"www.kazeta.eus"                                        

Iurre Bidegain                                        

2015-2-23                                        

(laburpena)