Kanbo-Donibane Garazi

"Maiatzaren 28an, Akitaniako eskualdeko lehendakaria den Alain Roussetek Baiona eta Donibane Garazi berriz lotuko dituen trenbidearen obrak bisitatu ditu. Hain zuzen ere, Kanbo Donibane Garazi trenbidearen lehen erraila pausatzeko Itsasura hurbildu da. Bere hitzen arabera, "Eskualdeko Kontseiluari esker aitzinatu den proiektua da". Ekimenean Kanboko auzapeza den Vincent Bruk, Baionako auzapeza den Jean-René Etchegarayk edo eskualdeko lehendakari ordea den François Maitiak parte hartu dute.

"Ez ditugu eskualdeko ibilbideak desagerrarazten. Akitania, bide berriak sortzen dituen eskualde bakarretariko bat dela uste dut", adierazi du Roussetek. "Trenaren aldeko apustuak" tokiko ekonomiari lagunduko diola gehitu du.

Hain zuzen ere, Donajakue Bidearen karietara, udan 2.500 bidaiarik trena hartuko luke. Biztanleei Baionako sarbidea errazteaz gain, ingurumenaren aldekoa dela adierazi du Roussetek.

"Errentagarritasuna duen ekintza publikoa da. Kutsadura gutxiago ukanen dugu, seguritatea ere eta gainera ehun urterako inbertsioa da", esplikatu du lehendakariak.

Eskualdeko kontseilaria den Alice Leiciaguecahar adierazpen horrekin bat dator. "Garaziko ekonomiarentzat onurak ekarriko ditu. Bidaiari anitzek hartzen ahalko dute, baina usaiak aldatu beharko dira. Gainera, liluragarria den bidaia da", esplikatu du.

2008ko kontu-ikustatze batek Baiona-Donibane Garazi arteko trenbidean obrak egin behar zirela ondorioztatu zuen. 2010ean iragan zen lehen fasean Baiona-Kanbo ibilbidea berritu zen. Proiektuak 18.5 milioi euroko aurrekontua izan du eta horietako 4.625 milioi euro eskualdeak eman ditu.
Bigarren fase batean Kanbo-Donibane Garaziko trenbidearen obrak gauzatzen ari dira. Estatuak, Akitaniako eskualdeak eta SNCF enpresak 44 milioi euroko aurrekontua kalkulatu zuten (bakoitzak 14.7 milioi euro).

2014eko ekainean, "zerbitzua ahal bezain azkar eskaintzeko eta obrek beranta ez hartzeko",  Alain Roussetek Estatu frantsesak eman beharko lukeen diru zama Akitaniako eskualdeak aurreratzea erabaki zuen. Hain zuzen ere, 29.7 milioi euro, aurrekontuaren %67a. "Nik nire hitza bete dut", gaineratu du lehendakariak".

"www.kazeta.eus"                         

Iurre Bidegain                         

2015-5-28                         

(laburpena)